Берничә тапкыр Бөтенроссия һәм халыкара конкурслар лауреаты, «Лучше всех» проекты җиңүчесе, Татарстан Рәисе стипендиаты. Сүзебез – «Голос. Дети» тапшыруында тамашачы мәхәббәтен яулап, икенче урын алган 12 яшьлек Сәет Галиуллин турында. Яшь артист белән тапшырудан калган хис-кичерешләр һәм аның иң зур хыялы хакында сөйләштек.
– Сәет, моңлы тавышың гаиләдән килгәнме?
– Әйе, минем әнием – җырчы һәм музыка укытучысы. Вокал дәресләрен дә миңа ул бирә. Абыем да матур җырлый, аңа ияреп, музыка мәктәбенә йөри башладым. Җиде яшемнән җыр белән шөгыльләнәм. Хәзер вокал һәм фортепиано бүлегендә укыйм.
– «Голос. Дети» проектында катнашырга күптән хыялланган идеңме?
– Өч ел рәттән әнигә «Голос. Дети» да катнашырга теләвем турында әйттем. Әни: «Әлегә син бәләкәй, җырлар туплагач, гариза бирү турында уйларбыз», – диде. Быел катнашуымны бик көттем. Гариза бирдек тә, безне Мәскәүгә кастингка чакырып алдылар. Әни миңа репертуар сайларга, шулай ук конкурсның һәр этабына әзерләнергә булышты.
– Кастинг ничек узды соң? Әзерлек турында да сөйләп ал әле бераз.
– Кастинг май аенда булды. Анда бер мең тирәсе бала катнашты. Чыгышларга әзерләнгәндә әз генә дулкынландым, тик югалып калмадым. Әни миңа классик җырларны сайларга тырыша. Кастингта мин «Веселый ветер», «Иделләре-күлләре», «Крылатые качели», итальянча «Giamaica» һәм «Бие әле» җырларын башкардым. Итальянча яратып җырлыйм, чит тел булса да, җыр сүзләрен ятларга авыр түгел. Соңыннан безне «Поединки»туры көтте. Бу өлештә миңа ике егет белән җырларга туры килде. «Слепые прослушивания»этабын да уңышлы уздым. Әлеге этапта – өч остаз, шулар арасында популяр җырчы JONY да бар иде. Ул мине үз командасына алды. Бик дулкынландыргыч минутлар кичердем. Әмма залда туганнарым, әти-әниләремне күрү белән тынычланып калдым. Татарстаннан, Казаннан да минем өчен күпләр җан атты бит. Күпме тавыш бирерләр икән, дип уйламадым, миңа аларның зур ярдәме турында белү дә булышты.
– Ә «Голос. Дети» финалына җыр ничек сайланды? Ни өчен татарча җыр башкармадың?
– Финалда – «Беловежская пуща», ә суперфиналда«Березовые сны» җырын башкардым. Аларны миңа әнием тәкъдим итте. Татарча җырлыйсым килгән иде, ләкин безгә бөтен кеше дә аңласын өчен рус телендә чыгыш ясау яхшырак була диделәр.
– Проектта нинди “йолдыз”лар белән танышып өлгердең?
– Дима Билан, JONY белән таныштым. Әле тапшыру тәмамланганнан соң, икенче көнне мине «Comedy Club»ка чыгыш ясарга чакырдылар. Шулай итеп, өйгә кайтып китү кичектерелде. Анда Павел Воля, Михаил Галустян белән кул биреп исәнләшеп, бергәләп фотолар төштек.
– Син гастрольләрдә еш йөрисең. Артист тормышы укуыңа комачауламыймы?
– Дәресләрне калдырырга туры килә. Әмма мин чыгышларга йөргәндә, юлда укырга тырышам. Гастрольләргә үзем белән дәфтәр, китапларымны алып барам.
– Ә нинди фәннәрне яратасың?
– Биология, физкультура һәм җыр дәресләрен яратам. Үскәч хирург буласым килә. Җырлап операцияләр ясармын.
– Буш вакытыңны ничек уздырасың?
– Буш вакытларым юк диярлек. Җырдан тыш, мин дзюдо белән дә шөгыльләнәм әле. Җәйләрен авылга әби-бабайга кайтам. Гаиләбез белән сәяхәт итәргә яратабыз. Быел Белоруссиягә бардык: Минск, Брест кирмәне, Бородино кебек җирләрне күреп кайттык.
БЛИЦ-СОРАШТЫРУ
– Яраткан ризыгың?
– Өлеш.
– Үзеңә нинди супер сәләт теләр идең?
– Бик-бик-бик көчле булу.
– Бу кышны һичшиксез эшләргә теләгән 3 әйберең?
– Чаңгыда шуу, кар ыргытып уйнау һәм кар көрәү.
– Иң зур хыялың?
– Артист буларак Татарстанны башка җирләрдә таныту.
Сәетнең әнисе Эльвира Сәләхова:
– Сәет татар мәдәнияте белән бик горурлана. Ул һәрбер конкурста татарча җырлар белән чыгыш ясый. «Шаян ТВ» каналы оештырган конкурсларда актив катнаша. Үткән елны гына да Сәет 40 тан артык концертта катнашты. Ялгызы гына чыгыш ясаудан тыш, «Батыр егетләр» ансамбле һәм абыйсы Әмир белән «Батырлар» дуэтында да җырлап, җиңүләр яулый ул. Хәзер безнең планнар зур, җырчы JONY Сәеткә уртак концерт тәкъдим итте, анда татар җырлары булачак. Татарстан Рәисе Рөстәм Миңнехановка, аның командысына, барлык татарларга, Россия халкына безнең өчен җан атып торганнары өчен гаиләбездән олы рәхмәтләребезне белдерәбез!
Чыганак: vatantat.ru
