Бүген, 24 июнь көнне, Свердловск өлкәсе Кадниково авылында Сабантуй бәйрәмен оештыру һәм үткәрү мәсьәләләренә багышланган күчмә киңәшмә узды. Киңәшмәдә Татарстан Республикасы Премьер-министры урынбасары, Бөтендөнья татар конгрессының Милли Шура рәисе Васил Шәйхразыев һәм Свердловск өлкәсе Губернаторы урынбасары Азат Салихов катнашты.
Катнашучылар 6 июльдә узачак бәйрәмгә әзерлекнең төп юнәлешләрен тикшерделәр. Зур чара кысаларында Татарстан, Башкортстан һәм Свердловск өлкәсенең төрле шәһәрләреннән иҗат коллективлары чыгышлары, халык һөнәрчелеге һәм кул эшләре күргәзмә-ярминкәсе, милли ризыклар дегустациясе, спорт ярышлары, халык уеннары һәм ат чабышлары үткәреләчәк.
Сабантуйда патриотик юнәлешкә аерым игътибар биреләчәк: бәйрәмнең төп чаралары Бөек Җиңүнең 80 еллыгына һәм махсус хәрби операция ветераннарын хөрмәтләүгә багышланачак.
