Похвистнево районының Гали авылында уникенче тапкыр уздырылган “Халкым минем” фестивалендә катнашкан Похвистнево һәм Камышлы районы үзешчәннәре җыр-бию аша төп теманы – Бөек Җиңүнең 75 еллыгын яктырта алдылар.
Бу фестивальне җирле эшмәкәр, Бөтендөнья татар конгрессы Башкарма комитеты әгъзасы, Похвистнево районының “Туган тел” татар җәмгыяте рәисе Расих Латыйпов (урыны оҗмахта булсын) өлкәдә яшәүче сәләтле милләттәшләребезне эзләп табу һәм, иҗат чаткысы кабызып, талантларын халыкка күрсәтү максатыннан башлап җибәргән иде. Күп еллар чара Татарстан ярдәме белән уздырылып килде. Быел исә ул районның Мәдәният идарәсе һәм “Туган тел” татар оешмасы тарафыннан оештырылды. Оештыручылар алмашынудан фестиваль оттырмады, шундый ук җылы һәм ижади атмосферада узды.
Алып баручылар Фирдәүсә Йосыпова һәм Юлия Акимова фестивальнең тарихы белән таныштырып үткәннән соң, сүзне икътисад һәм финанслар буенча район башлыгы урынбасары Мөдәррис Мамышевка бирделәр. Ул, галилеләрне, килгән кунакларны сәламләп, артистларга уңышлар теләде.
Беренче булып сәхнәгә хуҗалар чыкты. Гали авылының “Мирас” укытучылар төркеме (җитәкчесе Зөлфим Асылгәрәева) һәм “Шатлык” балалар төркеме совет халкының 1941 – 1945 еллардагы батырлыгына багышланган вокаль-хореографик композиция тәкъдим иттеләр. Җыр-бию аша галилеләр сугышка кадәрге тыныч тормышны, сугыш башлануын, ирләрне, газиз улларны фронтка озату күренешләрен күрсәттеләр. Тыл һәм сугыш күренешләре үрелеп барды, сугыш җырлары яңгырады. Аларның чыгышлары тамашачыларда да, жюри әгъзаларында да көчле тәэсир калдырды һәм беренче урынга лаек булды.
Мәчәләй авылы үзешчәннәре дә Бөек Ватан сугышы турында сәхнәләштерелгән күренеш тәкъдим иттеләр. Актерлык осталыклары сокландыргыч, җырлаган җырлары күңел кылларын тибрәтерлек, күзләрне яшьләндерерлек булганлыктан, жюри мәчәләйлеләрне икенче урынга лаек, дип тапты.
Камышлы районының Балыклы авылы үзешчәннәре дә бик матур чыгыш әзерләп килгәннәр. Мәдәният йортының сәнгать җитәкчесе Рәшит Фәрдиев үзенең иҗат җимешләрен – “Сәхаб абзый” һәм “Халкым минем” шигырьләрен укыды. Шагыйрьне бу якларда бик яхшы беләләр, аның эчтәлекле, тирән мәгънәле шигырьләрен яратып тыңлыйлар. Бу юлы да Рәшит Вәли улының чыгышы кайнар алкышларга күмелде.
Балыклы авылы талантларга, иҗади кешеләргә бай булуын Мәдәният йорты җитәкчесе Линар Абсаттаров та раслады. Ул өлкә татарларына автор-башкаручы буларак яхшы таныш. Бу юлы Линар “Саклыйк тынычлыкны” дип аталган җырын бүләк итте. Авторларның икесе дә махсус бүләкләр белән бүләкләнде, ә тулаем алганда, Балыклы авылы үзешчәннәре өченче урынны яуладылар. “Халкым минем” фестивале озын гомерле булсын! Чараны оештыручыларга һәм катнашучыларга зур рәхмәт сүзләре җиткереп, иҗади уңышлар теләп калабыз”, – дип рәхмәт сүзләрен җиткерде Линар Сәгыйть улы.
Туган җиргә, туган якка, туган йортка мәхәббәт – кеше күңелендәге иң саф, иң көчле хисләрнең берсе. Иң мөһиме, бу хисләр һәркайсыбызга таныш, аңлаешлы, йөрәкләребезнең иң тирән почмагына яшерелгән тойгылар.
Бөек Ватан сугышыннан солдатлар туган якларын, салкын чишмәләрен, куе урманнарын сагынып кайтканнар. Похвистнево районының Яңа Мансур авылы үзешчәннәре чыгышы нәкъ шул турыда иде. Зилә Шәрәфетдинова, Тәслимә Фәхретдинова, Алия Ильясова һәм Зөлфия Арсланова моңлы җырлары белән тамашачыларның күңелен яуладылар. Программаларында Бөек Ватан сугышы темасы бик ачылып бетмәү сәбәпле генә, жюри әгъзалары аларга да өченче урынны бирде. “Кызганычка, фестиваль уздырылуы турында соң ишеттек. Шуңа ныклап әзерләнергә вакытыбыз булмады. Шулай да тамашачылар да, жюри әгъзалары да программабызны мактадылар”, – дип уртаклашты Яңа Мансур авылы Мәдәният йорты җитәкчесе Тәслимә Фәхретдинова.
Жюри составына Гали авылының “Ак калфак” хатын-кызлар оешмасы рәисе Кәүсәр Шәйхетдинова, “Хәләл” оешмасы генераль директоры Кәүсәр Латыйпова һәм Самара өлкәсенең атказанган мәдәният хезмәткәре, “Раздолье” һәм “Денница” халык коллективлары җитәкчесе Гүзәл Гусарова керде.
Гали авылы җирлеге башлыгы Идрис Муллабаев һәм авыл халкы чараны оештыручыларга һәм Похвистнево районының “Туган тел” татар җәмгыяте рәисе Радик Сафиуллинга рәхмәт әйтеп, яшь талантларга мәйдан бирүче фестивальга озын гомер теләделәр.
Әминә Шиһапова
