ТР мәгариф һәм фән министрлыгы татар теленнән яңа дәреслек әзерли. Бу хакта бишенче чакырылыш Дәүләт Советының 46нчы утырышында ТР мәгариф һәм фән министры Рафис Борһанов әйтте.
– Бу мәсьәләдә инде туры юлга бастык дип әйтеп булмый. Фәннәр академиясе һәм күптөрле мәгариф институтлары бу мәсьәлә буенча бергәләшеп эшли башладылар. Минемчә, бу эшне быел төгәлләп булыр. «Ана теле» белән «Сәлам»не берләштереп, бөтен кеше өчен дә аңлашылырлык әсбап ясыйбыз, – диде министр.
ТР Мәгарифне үстерү институты каршында республика мәктәпләре өчен татар теле дәреслекләрен эшләү һәм гамәлгә кертү буенча Милли мәгарифне үстерү бүлеге эшләп килә.
