XXXV Татар яшьләре көннәре делегатлары Россия төбәкләрендә уздыру өчен проектлар тәкъдим итте. Самара, Чиләбе, Пермьнән килгән татар егетләре-кызлары акча оту өчен комиссия алдында проектларын яклады. Бу хакта «Идел» яшьләр үзәге матбугат хезмәте хәбәр итә.

Чаралар төрле: Самарадан килгән Илнара Касыймова яшь татар мөслимәләре өчен подкастлар эшләп яшьләр оешмасына яңа әгъзалар чакыруны оештырырга планлаштыра. Чиләбе егете Даниил Габдуллин татар яшьләре өчен экскурсияләр оештыра, шулай ук лекторийлар оештыру тәҗрибәсе дә бар. Әйтергә кирәк, соңгы җанисәп нәтиҗәләре буенча Чиләбе өлкәсендә 120 мең татар яши. Яшьләр татар тарихы, мәдәниятенә багышланган подкастлар яздырып, аларны социаль челтәрләрдә 20 мең кеше караган. Хәзер алар подкастларның яңа сериясен яздырырга уйлый.

Пермьнән Руслан Галимов берничә ел өстәл уеннары белән шөгыльләнә. Хәзер ул татар өстәл уеннарын таныту өчен Ульяновск, Самара өлкәсенә барырга планлаштыра. Комиссия составында катнашкан Пенза өлкәсе татар милли-мәдәни автономиясе рәисе Венера Мөхәммәдҗанова әлеге проект авторын Пензага чакырды.

Татар федераль милли-мәдәни автономиясе тарафыннан барлыгы 200 мең сумга биш проект хупланды. Автономия рәисе Илдар Гыйльметдинов яшьләргә уңышлар теләде һәм сертификатлар тапшырды, диелә хәбәрдә.

Чыганак: tatar-inform.tatar