12 февраль көнне Аслана мәдәният йортында “Таң йолдызы” 28 нче балар иҗаты һәм 9 нчы “Халык сәнгате” фестивальләре узды. Биредә Ялутор, Исәт һәм Заводоуковск районнарыннан җыелып килгән үзешчән артистлар, ансамбльләр район күләмендә генә түгел, 2 мартта өлкәдә узачак гала-концертта катнашырга тулы хокук яулар өчен дә ярыштылар. Өлкә татар мәдәнияте көннәре алдагы еллардагы кебек үк милләтләр эшләре буенча өлкә комитеты, өлкә мәдәният һәм мәгариф департаментлары, өлкә татар милли-мәдәни автономиясе, шулай ук район автономияләре тырышлыгы белән оештырыла.
Ярышчыларның чыгышларына өлкә автономиясенең башкарма директоры, музыкант Тимергали Мирасов җитәкчелегендә өлкә филармониясе солисты, опера җырчысы Эльвира Саниевская, җырчы, композитор Җәмилә Мирасова, фольклорчы, җырчы Луиза Сөрмәтова бәя бирделәр. Шулай ук тиздән өлкәдә узачак фольклор фестивалендә катнашучыларны да сайладылар. Бу вазифаны фольклор фестивале пректының авторы – Вәлимә Ташкалова, проект җитәкчесе, “Яшь буын” өлкә татар яшьләре оешмасы җитәкчесе Фәрит Корманов, педагогия фәннәре кандидаты, музыкант Рафаэль Гадиев үтәделәр. Катнашучылар 6 номинация буенча ярыштылар. Җыр-бию, музыка тавышы 4 сәгать буена туктамады.
Шунысы сөенечле: быел күпләр театр жанры буенча эшләгәннәр. Аларның чыгышлары концерт программасына яңалык, үзенчәлек кертеп, тамашачыларның кәефләрен күтәрде. Жюри әгъзалары иң-иңнәрне сайлаган арада җирле җырчыларыбыз Эльвира Саниевская, Җәмилә Мирасова, Луиза Сөрмәтова кунакларга үзләренең матур җырларын бүләк иттеләр.
