— Грант ярдәмендә без кабинетны шактый яңарта алачакбыз. Бүлеп бирелгән акчаларга сыйфатлы рәсем материаллары, график планшетлар, шулай ук проектор яки зур телевизор алырга ниятлибез. Бу дәресләрне тагын да заманча һәм кызыклырак итәчәк. Балалар гуашь һәм карандаш белән генә түгел, ә цифрлы форматта да иҗат итәргә өйрәнәчәк, — дип сөйли педагог Алина Солтанова.

Проектор куллану рәсем ясау процессын зур экранга чыгару мөмкинлеге бирәчәк. Бу укучыларга эшләү техникасын яхшырак күрергә һәм яңа алымнарны тизрәк үзләштерергә ярдәм итәчәк.

Проектның төп бурычы — балаларның иҗади сәләтләрен үстерү, сәнгатькә мәхәббәт тәрбияләү һәм һәр балага үзен чын рәссам итеп тоярга мөмкинлек бирү.

Проект берничә этапта тормышка ашырылачак. Әзерлек этабында кабинет кирәкле җиһазлар һәм иҗат материаллары белән тулыландырылачак. Аннан соң төп этап башланачак — дәресләр үткәреләчәк, анда традицион рәсем техникасы заманча цифрлы технологияләр белән берләштереләчәк. Ел дәвамында балалар һәм педагоглар катнашында осталык дәресләре, иҗади очрашулар үткәрү дә планлаштырыла. Проект ахырында укучылар эшләреннән күргәзмә оештырылачак.

Педагог сүзләренчә, проект идеясе очраклы гына тумаган.

— Рәсем ясау — бала өчен үз фикерләрен һәм хисләрен белдерүнең табигый юлы. «Төсле күпер» исеме дә символик мәгънәгә ия: күпер кешеләрне, идеяләрне һәм мөмкинлекләрне тоташтыра, ә төсләр иҗатны, фантазияне һәм балачак дөньясын чагылдыра. Безнең проектта традицион сәнгать белән заманча технологияләр очраша, — дип аңлата Алина Солтанова.

Ләйсән Газизова.