Бүген, 28 гыйнвар көнне, Тверь шәһәрендә Тверь өлкәсе татарлар автономиясе үзешчәннәре катнашында Татарстан Республикасы артистлары концерты булды. Чара “Панорама” киноконцертлар залында узды.

Татарстан Республикасы Премьер-министры урынбасары, Бөтендөнья татар конгрессы Милли Шура рәисе Васил Шәйхразыев чарада катнашучыларны сәламләде һәм Тверь өлкәсе татар мәдәниятен үстерүгә зур өлеш керткән активистларны бүләкләде.

Тантаналы өлештән соң тамашачыларны матур концерт программасы көтте. Биредә Татарстан Республикасы артистлары Сөмбел Билалова һәм Алмаз Хәсәнов чыгыш ясады. Артистлар үзләренең осталыклары белән тамашачыларны сөендерделәр, чын бәйрәм рухы тудырдылар.

Концерт мәдәни вакыйгага гына түгел, татар җәмәгатьчелеге вәкилләре белән тамашачылар арасында аралашу һәм тәҗрибә уртаклашу мөмкинлегенә дә әверелде. Бу чара тагын бер кат раслады: мәдәният кешеләрне, аларның чыгышына һәм яшәү урынына карамастан, берләштерә.