Үткән ел ахырында Түбән Новгородның “Рекорд” мәдәни үзәгендә ХII Регионара “Милли көй” фестиваленең гала-концерты гөрләп узды. Аны өлкә татарларының милли-мәдәни автономиясе өлкә хөкүмәтенең мәдәният һәм эчке эшләр министрлыклары, Бөтендөнья татар конгрессы ярдәмендә оештырды. Беренче турда катнашучылар оештыру комитетына видеоязмалар юллаган иде, ә инде гала-концертта катнашырга абруйлы жюри тарафыннан иң яхшы дип табылган катнашучылар һәм коллективлар чакырылды.
Фойеда районнар делегацияләре кул эшләреннән торган бик матур күргәзмә оештырды, ул барысында да зур кызыксыну тудырды. Шулай ук һәр район һәм автономия тарафыннан милли ашлар белән сыйлау да оештырылган иде.
Кунакларны безнең Мөтеравыл мәдәният йорты каршында эшләп килүче “Умырзая” һәм Спас районы Тукай авылы һәвәскәрләреннән торган “Авыл кызлары” фольклор төркемнәре каршы алды.
Фестивальне бик матур итеп якташ-милләттәшебез Зөлфия Сәмиуллина алып барды. Катнашучыларны, залны шыгрым тутырып килгән тамашачыларны өлкә мәдәният министрлыгы, автономия җитәкчелеге җылы котлады һәм җиңүчеләргә Дипломнар белән сертификатлар тапшырды. Аларга Түбән Новгородтан “Нижгарочка” төркеме (җитәкчесе Камилә Абрагимова), “Туган як моңнары” ансамбле (җитәкчесе Дамир Фейсханов), Гүзәлия Шакерова җитәкчелегендәге “Авыл кызлары” һәм Лима Жалилова җитәкчелегендәге “Умырзая” фольклор төркемнәре, Кызыл Октябрь округының “Бәйрәм” вокаль ансамбле (җитәкчесе Фәрит Абдрахманов), Сафаҗайдан Шәмилә Айнетдинова белән Илгиз Измайлов дуэты, баянчы Азат Жиһаншин (Кочко-Пожар) һәм Татар Моклокасыннан “Татар хатыннары” төркеме (җитәкчесе Гализә Кукаева) лаек булды. Фестиваль регионара булганга, Татарстан һәм Мордовия республикалары коллективлары арасында да бүләкләнүчеләр булды.
Фестиваль программасын бөтен дөньяга киң танылган “Казан” бию ансамбле башлап җибәрде. Казан филармониясе артистлары, төрле халыкара конкурслар лауреатлары Алмаз Хәсәнов белән Ләйсән Сөнәгатованың чыгышлары да искиткеч иде.
Әлбәттә, югарыда әйтеп үткән үзешчән коллективлар да сәхнәгә чыкты һәм барлык чыгышлар кайнар алкышларга күмелде.
Аннары алып баручылар сәхнәгә бу фестивальләрне оештыруга күп көч сарыф иткән, безнең кебек гади авыл үзешчәннәрен өлкә сәхнәсенә мендерүдә зур тырышлык куйган, бер сүз белән әйткәндә, “Милли көй”нең әйдәп баручысы булган Зилә ханым Ахмадуллинаны чакырдылар. Ул барча катнашучыларга рәхмәт белдереп, “Туган як моңнары” ансамбле солисты Марат Муллинга, автономия активистлары Венера Җәфәрова белән Динара Юсиповага өлкә мәдәният министрлыгының Рәхмәт хатларын тапшырды. Фестиваль “Казан” ансамбленең искиткеч чыгышлары белән тәмамланды.
Шушы матур җыр-моң бәйрәмен оештырган өчен өлкә татар автономиясенә, шәхсән Зилә ханыма чиксез рәхмәт белдерәбез.
Киләсе очрашуларга кадәр, дуслар!
Лима ЖАЛИЛОВА.
Мөтеравыл
“Туган як” газетасы
