Бүген, 27 октябрь көнне, Бөтендөнья татар конгрессының Башкортстандагы вәкиллек офисында Башкортстан татарлары конгрессы әгъзалары утырышы узды.
⠀
Утырышның көнүзәк мәсьәләсе – 2021 елда үтәсе Башкортстан татарлары конгрессы съезды хакында сөйләшү булды. Башкортстан татарлары конгрессы җитәкчесе Заһир Хәкимов әйтүенчә, февраль аенда республикабыз районнарында утырышлар үткәрү каралса, төп чаралар Уфа шәһәрендә 27-28 мартта узачак.
Съезд үз эченә 4 секцияне алачак. Монда мәгариф, мәдәният, яшьләр һәм эшкуарларга багышланган бүлекчәләр көн дәвамында эшләп киләчәк. “Татар юлы” дип аталган әдәби-музыкаль чара да әлеге съездның бизәге булыр дип ышана Заһир Хәкимов.
⠀
Очрашу ахырында бүген туган көнен билгеләгән социология фәннәре докторы Рушан Галләмовка Альфред Дәүләтшин бүләк тапшырды.
Гөлшат Сафина
Уфа
