Бүген, 28 август көнне, Татарстан Республикасы Рәисе Рөстәм Миңнеханов катнашында “Милләт җыены”ның пленар утырышы уза. Биредә Уфа шәһәреннән татар галиме, икътисад фәннәре докторы, профессор, Россия Табигый фәннәре академиясенең хакыйкый әгъзасы, Россиянең, Татарстанның һәм Башкортстанның атказанган фән эшлеклесе Касыйм Мөхәммәтназиф улы Йосыпов чыгыш ясады.

Касыйм Йосыпов үзе җитәкләгән төбәк-тармак икътисади мәктәбе, басылып чыккан 455 хезмәте, туган телдә язылган китаплары турында сөйләде. Аерым игътибарны “Тамырлар” исемле шәҗәрә китабына юнәлтте, анда фәнни идентификация алымнары кулланылуын билгеләп үтте.

Касыйм Йосыпов 63 еллык хезмәт юлының 56 елын фәнгә багышлавын билгеләп үтте. Икътисад өлкәсендә 455 фәнни хезмәт авторы буларак, ул төбәк икътисады буенча зур фәнни мәктәп булдыруга ирешкән. Шәкертләре арасында 3 фән докторы һәм 16 фән кандидаты бар.

Галим үзенең туган телдә язылган китапларын аерым искә алды. Алар арасында “Тамырлар” исемле шәҗәрә китабы фәнни инновацион алымнар кулланып төзелгән булуы белән аерылып тора. Ул бу эшне татар телендә алып баруның әһәмиятен ассызыклады.

Чыгыш азагында Касыйм Йосыпов татар теле мәсьәләсенә тукталды. Ул Уфа татарларының милли тормышы актив булуын искәртте: дәүләт һәм халык театрлары эшли, 30дан артык татар телле басма нәшер ителә, радио-телевидение эшли. Әмма татар теленең статусы һәм мәктәпләрдә туган телне укыту мөмкинлекләре борчу тудыра.

“Мәктәпләрдә татар телендә белем алу кими барганда, без берничә буынны югалту куркынычы алдында калабыз. Бу мәсьәләгә бөтен республика җитәкчелекләре игътибар итәргә тиеш”, — диде галим.

Чыгышын йомгаклап, Касыйм Йосыпов Татарстан җитәкчеләренә үзенең яңа “Хәтер” китабын бүләк итте һәм милләтне саклауда бердәмлеккә чакырды.