Бүген, 11 май көнне, Казанга Уфа «Ихлас» мәчете оештырган һәм Башкортстанның Илеш, Иглин, Нуриман районнарыннан   бер төркем  милләттәшләребез килде. Казанга сәяхәт кылырга килгән дин кардәшләребез «Казан Кремле» Дәүләт тарих-архитектура музей-тыюлыгы,  Казанның 1000 еллыгы музее белән таныштылар. Шулай ук программа кысаларында алар Бөтендөнья татар конгрессы Башкарма комитеты җитәкчесенең Россия Федерациясе төбәкләрендәге татар иҗтимагый берләшмәләре белән эшләү буенча урынбасары Марс Тукаев белән дә очраштылар.