Бүген, 21 март көнне, Ульяновск шәһәренең иң зур спорт сараенда – “Волга-Спорт-Арена”да өлкә ифтары узды.
Төбәктә өлкәкүләм Ифтар мәҗлесләре 2008нче елдан бирле үткәрелә һәм катнашучылар саны ягыннан Татарстандагы Республикакүләм Ифтарлардан гына калыша. Ифтар мәҗлесен төп оештыручылар “Сембер” татар эшмәкәрләре клубы һәм Ульяновск өлкәсе мөселманнары Диния нәзарәте.
Чарада Татарстан Республикасы Премьер-министры урынбасары, Бөтендөнья татар конгрессы Милли Шурасы рәисе Васил Шәйхразыев; Ульяновск өлкәсе губернаторы Алексей Русских; Ульяновск өлкәсе татар милли-мәдәни автономиясе рәисе Рамис Сафин; Ульяновск өлкәсе мөфтие, региональ диния нәзарәте рәисе Илдар хаҗи Сафиуллин; Ульяновск өлкәсе сәнәгатьне һәм эшкуарлыкны үстерү фондының Директорлар советы рәисе Руслан Гайнетдинов; Ульяновск өлкәсе татар бизнесменнарының Сембер оешмасы президенты Эльмира Алиакберова һәм башкалар катнаштылар. Барлыгы мәҗлескә 5000 кунак килде.
Милли Шура рәисе Ульяновск өлкәсе губернаторына, милләттәшләребезгә һәм диндәшләребезгә ел саен шундый мөмкинлек тудырганнары өчен рәхмәтен җиткерде, Ульяновск өлкәсенә тәҗрибә алу өчен төрле төбәкләрдән милләттәшләребез килүен билгеләп узды. Шулай ук Васил Шәйхразыев Бөтендөнья татар конгрессы бүләкләрен тапшырды.
Бөтендөнья татар конгрессының Татар милләтенә күрсәткән олы хезмәтләре өчен» медале белән Ульяновск өлкәсе «Сембер» татар эшмәкәрләре клубы» иҗтимагый оешмасы әгъзасы Үмәр Айбулатов бүләкләнде. Милләтебез алдындагы олы хезмәтләрен искә алып, татар халкының телен, мәдәниятен үстерүдә, гореф-гадәтләрен саклап калуда башкарган зур эшләре өчен Бөтендөнья татар конгрессының Рәхмәт хаты Ульяновск өлкәсе «Сембер» татар эшмәкәрләре клубы» иҗтимагый оешмасы әгъзасы Гөлсинә Аитовага тапшырылды.
Кунакларны Ульяновск өлкәсе губернаторы Алексей Русских та сәламләде. Чара кысаларында махсус хәрби операциядә уллары, ирләре хезмәт иткән ханымнарга бүләкләр тапшырылды.
