Татарстан Республикасы Премьер-министры урынбасары, Бөтендөнья татар конгрессының Милли Шура рәисе Васил Шәйхразыев эш сәфәре белән Донецк Халык Республикасында. Биредә ул Донецк шәһәр округы муниципаль берәмлеге башлыгы Алексей Кулемзин белән очрашты.
Чарада Архангельск һәм Оренбург өлкәләре татар милли-мәдәни мохтариятләре рәисләре Рим Кәлимуллин, Илдус Дәүләтов, шулай ук Самара өлкәсе татарларының «Дуслык» иҗади-иҗтимагый оешмасы рәисе Фәхретдин Канюкаев катнашты.
Очрашу вакытында Васил Шәйхразыев җылы кабул итүләре өчен рәхмәт белдерде һәм әңгәмәдәшен сәфәр программасы белән таныштырды. Әңгәмә барышында Васил Шәйхразыев шулай ук Халыкара шахтерлар Сабан туен оештыру планнары турында сөйләде. Ул бу бәйрәмне Донецк Халык Республикасында, төбәктә тынычлык урнашкач, уздырырга өмет белдерде.
Алексей Кулемзин билгеләп үткәнчә, Донецк Халык Республикасында бик күп татарлар яши. Ул шулай ук кунакларны узган Ураза бәйрәме белән котлады. Шәһәр башлыгы төбәктә Диния нәзарәте һәм татар иҗтимагый оешмасының эшен югары бәяләде.
