Бүген Төмән өлкәсенә эш сәфәре кысаларында Татарстан Республикасы Премьер-министры урынбасары, Бөтендөнья татар конгрессының Милли Шура рәисе Васил Шәйхразыев “Искер” тарихи-мемориаль комплексы белән танышты. Комплекс буйлап экскурсияне проектның авторы һәм җитәкчесе Луиза Шәмсетдинова үткәрде.
Искер шәһәре Тобольскидан 18 чакрым ераклыкта Иртыш елгасы буенда XV–XVI гасырларда хәрби ныгытма буларак барлыкка килә. 1495 елларда ул Себер ханлыгының башкаласына әйләнә. Бүгенге көндә комплекс территориясендә музей, чәйханә һәм кунак йорты эшләп килә.
