Татарстан Республикасы Премьер-министры урынбасары, Бөтендөнья татар конгрессының Милли Шура рәисе Васил Шәйхразыев Луганск шәһәрендә Чаллы эшмәкәре Рөстәм Гатин һәм аның командасы белән очрашты. Рөстәм Гатин “Кыр кухнясы” проектын оештырган билгеле шәхес. “Кыр кухнясы” масштаблы шәһәр чараларында туклануны оештыру буенча коммерцияле проект. Башта команда йортсызларны һәм мохтаҗларны да ашата.
Соңрак Рөстәм сугыш хәрәкәтләреннән зыян күрүчеләр өчен Лисичанскида кыр кухнясы оештыра. Кайнар ризык вакытлыча яшәү пунктларына, хастаханәләргә, балалар бакчаларына һәм гуманитар ярдәм үзәкләренә китерелеп, шәһәр буйлап таратыла. Алты кешедән торган команда (профессиональ пешекче – Гатин үзе генә) көн саен биш мең кешене ашата.
