Татарстан Республикасы Премьер-министры урынбасары, Бөтендөнья татар конгрессы Милли Шурасы рәисе Васил Шәйхразыев эш сәфәре белән Оренбург өлкәсендә. Биредә ул Шарлык районының Мостафа авылында Муса Җәлил исемендәге мемориаль музей комплексында булды.

Экскурсия барышында музейга М.Җәлилгә багышланган китаплар бүләк ителде, шагыйрьнең 120 еллыгы алдыннан музейны тулыландыру, баету буенча Васил Шәйхразыев үзенең тәкъдимнәрен җиткерде.

Муса Җәлил туган Мостафа авылы Оренбург өлкәсенең Шарлык районында өлкә үзәгеннән 150 чакрым ераклыкта урнашкан. Бу – шагыйрьнең “кече Ватаны”, биредә аның балачак һәм яшьлек еллары үткән.

Шагыйрь истәлегенә багышланган беренче музейларның берсе нәкъ менә аның туган авылында барлыкка килә. 1960 елларда ук туган якны өйрәнү мәктәбендә шагыйрьнең музей почмагын булдыралар. 1972 елда мәктәпнең яңа бинасында Муса Җәлил музее ачыла.

Яңа музей экспозициясе 2013 елда ачылган. «Шагыйрьнең балачагы һәм яшьлеге» исемле беренче зал XVIII гасырда Казан губернасы, Мостафа авылы татарларының Ырынбурны үзләштерү тарихына, М.Җәлилнең гаиләсенә һәм яшьлегенә багышланган.  «Муса Җәлил иҗатында кызыл чор» ның икенче залы шагыйрьнең 1917 елгы революция, аннан соң Гражданнар сугышы һәм Совет власте торгызылу чорындагы тормышы һәм иҗаты, Оренбургта һәм Казанда укыган еллары белән таныштыра. Өченче зал ” Муса Җәлил тормышының һәм иҗатының сугышка кадәрге чоры. 1927-1941 еллар ” Мәскәү һәм Казанда чәчәк ату чоры һәм актив иҗтимагый тормыш турында сөйли.

«Үлемсезлеккә юл» залы шагыйрьнең соңгы елларын, аның фронттагы һәм фашист төрмәләрендәге көрәшләрен, Россия шәһәрләрендә һәм чит илләрдә М.Җәлил истәлеген һәм образын мәңгеләштерүне чагылдыра.

Комплекс шагыйрь, Советлар Союзы герое, «Моабит дәфтәрләре» авторы Муса Җәлил тормышына һәм батырлыгына багышланган әһәмиятле тарихи объект булып тора.

Музейдагы экскурсиядән соң делегатлар Мостафа урта гомуми белем бирү мәктәбе белән таныштылар.