Бүген, 30 август, Татарстан Республикасы бәйрәм көнендә «Уйнагыз, гармуннар!» халык иҗаты фестивале уза. Фестиваль быел үзенең түгәрәк датасын – 40 еллык юбилеен билгеләп үтә, Россиянең төрле регионнарыннан булган талантлы милләттәшләребезне берләштерүче мәдәни чара булып тора.

Бәйрәм кунакларын Татарстан Республикасы Премьер-министры урынбасары, Бөтендөнья татар конгрессы Милли Шурасы рәисе Васил Шәйхразыев сәламләде. Ул Татарстан Республикасы Рәисе Рөстәм Миңнеханов исеменнән тәбрикләү сүзләрен җиткерде.

“Россиянең 20 өлкәсеннән 700дән артык гармунчылар, катнашучылар бирегә җыелды. Казан сезне бәйрәм көнендә генә түгел, һәрвакыт көтә. 26-28 август көннәрендә дөнья буйлап сибелеп яшәүче халкыбызны җыйган “Милләт Җыены” узды. Без татарлар шундый халык. Яңгыр ява икән – рәхәт, бәхеткә, дибез. Кояш чыга икән – шулай ук бәхеткә дибез. Горурлык белән алга барырга насыйп булсын”, – дип горурлык белән мөрәҗәгать итте бәйрәм кунакларына Васил Габтелгаяз улы. Милли Шура рәисе махсус хәрби операциядәге егетләргә дә уңышлар теләде.

   Шулай ук Васил Шәйхразыев дәүләт бүләкләрен һәм рәхмәт хатларын тапшырды.

“Уйнагыз, гармуннар!” фестивале концерт һәм гармунчылар парады белән дәвам итәчәк. Фестиваль “Татарстан – Яңа гасыр” телеканалыннан туры трансляциядә күрсәтелә.