Татарстан Республикасы Премьер-министры урынбасары, Бөтендөнья татар конгрессы Милли Шурасы рәисе Васил Шәйхразыев эш сәфәре белән Донецк Халык Республикасында. Биредәге В.В. Куйбышев исемендәге мәдәният сараенда ул Донецк Халык Республикасының татар иҗтимагый оешмасы активы белән очрашты.
Васил Шәйхразыев чарада катнашучыларны сәламләде һәм Бөтендөнья татар конгрессының тарихы, эшчәнлеге, проектлары турында сөйләде. Ул татар халкының мәдәни мирасын һәм традицияләрен саклауның мөһимлеген билгеләп үтте. Милли Шура рәисе ассызыклаганча, мондый очрашулар һәм чаралар Татарстаннан читтә урнашкан татар җәмгыятьләре арасында элемтәләрне ныгытуга ярдәм итә.
Концерт программасы артистлар һәм төрле коллективларның чыгышларыннан төзелгән иде. Тамашачыларны Татарстанның Халык артисты Зәйнәб Фәрхетдинова, Татарстанның Атказанган артисты, Бөтендөнья татар конгрессының Милли Шура әгъзасы, Архангельск өлкәсе татар милли-мәдәни мохтарияте рәисе Рим Кәлимуллин һәм халыкара конкурслар лауреаты Сөмбел Билалова үзләренең чыгышлары белән сөендерделәр.
Тамашачыларга традицион татар биюләре дә, заманча музыкаль номерлар да тәкъдим ителде.
