Татарстан Республикасы Премьер-министры урынбасары, Бөтендөнья татар конгрессы Милли Шурасы рәисе Васил Шәйхразыев Үзбәкстан Республикасына эш сәфәре кысаларында Ташкентта татар мирасының уникаль архитектура һәм тарихи һәйкәле булган Шәрәфи бәй мәчетендә булды.
Мәчет 1868 елда абруйлы татар сәүдәгәре, меценат һәм Ташкентның Азия өлешендәге хуҗалык идарәсенең беренче рәисе Шәрәфетдин Зәйнәгобиддинов (Шәрәфи бәй) тарафыннан төзелә. Ул шәһәргә Коканд ханлыгы чорында ук килгән һәм төбәктә татар җәмгыятенең күтәрелешендә мөһим роль уйнаган.
Шәрәфи бәй төзегән комплекска мәчет, мәдрәсә һәм торак корылмалар кергән. Мәчет бинасы үзенчәлекле архитектурасы белән аерылып торган, гөмбәз һәм агач элементларны, сәнгати бизәкләр һәм орнамент мотивларын берләштергән. Үзгәртеп коруларга карамастан, ул үзенең тарихи кыйммәтенең шактый зур өлешен саклап калган.
