2025 елның 26-28 февраль көннәрендә Бөтендөнья татар конгрессы XIII Бөтенроссия татар авыллары эшмәкәрләре җыенын оештыра. Бүген “Корстон” сәүдә үзәгендә Татарстан Республикасы Рәисе Рөстәм Миңнеханов катнашында җыенның пленар утырышы уза.
Кунакларны Татарстан Республикасы Премьер-министры урынбасары, Бөтендөнья татар конгрессының Милли Шурасы рәисе Васил Шәйхразыев сәламләде.
-Җыенда Россия Федерациясенең 46 төбәгеннән һәм Татарстан Республикасыннан барлыгы 900 татар эшмәкәре катнаша. Иң өлкән делегатыбыз – Башкортстан Республикасыннан 84 яшьлек Рәфкать Әхмәт улы Фәйзуллин, иң яше – 18 яшьлек Самара өлкәсе вәкиле Региль Ренат улы Искәндәров, – дип билгеләп узды ул.
