Зирекле авылы Мидхәт Газыймов исемендәге музейда хөрмәтле кунаклар – Бөтендөнья татар конгрессы Башкарма комитетының Татар төбәк тарихын өйрәнүчеләре белән эшләү комитеты җитәкчесе, Бөтендөнья татар конгрессының Милли Шура әгъзасы, Татарстан Республикасы «Татар төбәк тарихын өйрәнүчеләр җәмгыяте» региональ иҗтимагый оешмасы Советы рәисе Борһанов Альберт Әхмәтҗан улы, туган авылы Иске Кармәт турында ике китап авторы: «Иске Кармәт авылы тарихы» (2017) һәм «Өметнең чиге юк» (2018), күп кенә мәкальләр авторы, төбәкче Салиев Равил Зөфәр улы, Чистай районы төбәкчесе Хафизов Әхәт Ситдыйк улы белән эшлекле очрашу булып узды. Очрашуда Бөтендөнья татар конгрессының Яңа Чишмә район бүлеге җитәкчесе, Зирекле лицее директоры Хаметвалиев Айрат Минвәли улы катнашты.
Түгәрәк өстәл артында музей эшчәнлеге, үз төбәгебездә башкарылган эшләр, чаралар турында фикер алыштык. Киләчәккә планнар, эш юнәлешләре һәм аларны гамәлгә ашыру юллары билгеләнде.
Галим Альбер Әхмәтҗәнович төбәк тарихчысын, Мидхәт Гариф улын сагыну, горурлану һәм бик җылы хатирәләр белән искә алды, төбәкчеләр кат-кат рәхмәт сүзләрен җиткерделәр. Аның хезмәтенең әйтеп бетергесез зур әһәмияте хакында әйттеләр.
Альберт Әхмәтҗанович Татарстан Республикасы «Татар төбәк тарихын өйрәнүчеләр җәмгыяте» региональ иҗтимагый оешмасы исеменнән музейга һәм аның директоры Лотфуллина Лидия Зөфәр кызына Мактау кәгазьләре тапшырды. Кунаклар исеменнән музей коллективына эшләрендә уңышлар теләп, рәхмәт сүзләре җиткерде.
Музейга шәхси китаплар бүләк итте.
Хөрмәтле кунакларыбызга музей коллективы исеменнән, безне хөрмәт итеп, олылап килгән һәм файдалы киңәшләре өчен чиксез рәхмәтебезне белдерәбез.
