Советлар Союзы герое Бакый Рәхимов исемендәге Кенә төп гомуми белем бирү коллективы, Бөтендөнья татар конгрессы төбәкара берләшмәсе, районыбызның мәгариф, мәдәният бүлекләре белән берлектә узган фестивальдә республикабызның төрле районнарыннан, Казан шәһәреннән, Киров өлкәсеннән 7 яшьтән алып 15 яшькәчә булган балалар катнашты.

Конкурс якташларыбыз – Татарстанның атказанган җырчысы Җәваһирә Сәләхова, халык җырчысы Риммма Ибраһимованың дәвачыларын барлау, татар халык иҗатын яшь буынга пропагандалау максатыннан үткәрелде. Милли җәүһәрләребездән булган халык җырларының матурлыгын, фольклор әсәрләрнең аһәңлеген ассызыклап, җырлы-биюле халык уеннарына мәхәббәт тәрбияләүче фестиваль ике этапта үтте. Беренче турга 210 гариза кабул ителде. Онлайн варианттагы чыгышлар да бәяләнде.

Ул көнне сәхнәдә милләтебезнең җанын сугарып торучы тел, моң, хәтер дигән төшенчәләр тантана итте.

– Фестивальдә катнашырга 200-300әр бала заявка бирә, – ди Шәмсия Җиһангирова бүләкләү өчен сәхнәгә күтәрелгәч. – Җиңүчеләргә Бөтендөнья татар конгрессы матур, яхшы бүләкләр әзерли. Мин бу эшкә белеп тә алынмаган идем, хәзер исә фестивальнең нәтиҗәлелеген күреп, оештыручыларның фидакарь хезмәтләренә инанып, димәк, мин изге юлда – халкыма хезмәт итүдә дип куанам.
Айдар Хәйретдинов жюри вәкилләренә Рәхмәт хатлары тапшырды, «Районыбызны, балаларыбызны хөрмәт итеп кайтканыгыз өчен рәхмәт. Сез киләсе бар дип мәдәният йортын да, авыл мәктәбен дә яхшы иттереп ремонтлатып куйдык », дип, шаяртырга да онытмады. «Киләчәктә дә районыбызга карата ихтирам һәм хөрмәт югалмасын иде. Матур җырлар гына җырлап, матур шигырьләр генә сөйләп, шушылай матур итеп кенә яшик» дип төгәлләде ул үзенең чыгышын.

Фестивальдә мәшһүр композиторларның әсәрләрен башкару өлеше гаять тә үзенчәлекле узды, – бөек шәхесләребезнең әсәрләрен балаларыбыз башкара, ул әсәрләр гадәти генә түгел, профессионал җырчыларга гына хас кебек – әмма нәкъ менә шушы фестивальдә Марсель Галиев сүзләренә Луиза Батыр-Болгари көй язган «Су буеннан әнкәй кайтып килә» җырын унөч яшьлек Әтнә районы Бәрәскә урта мәктәбе укучысы Чулпан Шәвәлиева башкаруында ишетү күңелләрне иркәләде. Чулпан йөрәкләргә үтеп керерлек итеп җырлап, Гран-прига ия булды. Катлаулы әсәрләрне уңышлы башкарып, 7-10 яшьлекләр арасында Норма урта мәктәбеннән Айсылу Кәримова – беренче, Казан каласыннан Аяз Әсхәдуллин – икенче, Әтнә районыннан Айрат Фазылҗанов, Балтач гимназиясеннән Әдилә Сабирова өченче урыннарга лаек булдылар.11-15 яшьлекләр арасында Кенә төп мәктәбеннән Мәрьям Камалиева беренче, Шубан мәктәбеннән Раян Садыйков икенче, Арча районыннан Адел Антипов өченче урыннарны алды. 11-15 яшьлекләр арасында узган фольклор бәйгесендә Нөнәгәр урта мәктәбенең яшьлек фольклор ансамбле «Ат саклау» йоласын тәкъдим итеп, беренче урынга иреште. 7-10 яшьлекләр арасында Арчаның «Энҗе бөртекләре» фольклор коллективы «Бәрәкәтле мич коты» дигән уен йоласын күрсәтеп, шулай ук беренче булды. Татар халык җырларын башкару буенча 7-10 яшьлекләрдән беренче урынны Кенәбәш башлангыч мәктәп-балалар бакчасында тәрбияләнүче Алия Һадиева алды. Икенче урын Арча районыннан Камилә Абдрахмановага бирелде. Өченче урынга Арча районыннан Дилә Камалетдинова лаек булды. 11-15 яшьлекләр арасында 1 урын Кенә төп мәктәбеннән Гөлназ Һадиевага бирелде, 2 урынга Бөрбаштан Сәйдә Сираҗиева лаек булды, 3 урынны Балтачтан Нәсимә Сәлахова алды.

Нәфис сүз сөйләү осталары да елдан-ел арта, әлеге сәнгать төре гаять тә актуальләшә бара. Моның шулай икәнлеген жюри вәкиле Рафил Җәләлиев та әйтеп үтте. 7-10 яшьлекләр арасында Балтач урта мәктәбе укучысы Зифа Фатыйхова Гран-при алды. Шулай ук Балтач урта мәктәбеннән Мәликә Абдуллина беренче булса, калган ике урын Арча белән Сабаның талантлы балаларында. 11-15 яшьлекләр арасында 1 урынны Малмыж районыннан Әминә Кашапова алды, икенче урында – Балтач урта мәктәбеннән Наргизә Хәбибрахманова, өченче урында Арчадан Илназ Галимҗанов.

Бәйге оештырылуы ягыннан да, уздырылуы белән дә зур әһәмияткә ия. Биредә Римма Ибраһимованың туганнары, авылның күренекле кешеләре, патриотлар Шамил ага, Тәскирә апа да телгә алынды. Бу хакта үзенең чыгышында жюри вәкиле, озак еллар район мәдәният бүлеге мөдире булып эшләгән, хәзер исә район ветераннар советын җитәкләүче Радик Михайлов белдерде: «Тәскирә апа авылга Советлар Союзы Герое Бакый Рәхимовның бюстен куйдырган кеше ул, хәзер исә авыл өчен янып яшәгән даһиларның үзләренә бюстлар кую турында уйланырга кирәк», диде.

Әнә шулай, мәгънәле һәм эчтәлекле узды фестиваль. Римма Ибраһимова әйткәнчә, куанырлык, горурланырлык, алга таба шатланып атларлык булды. Файдалы чараларның озын гомерле булуын телик. Аның өчен фестивальнең башында торган Кенә төп белем бирү мәктәбе директоры Рамил Низамиевка, хәзерге вакытта Таузар мәктәбе директоры Римма Низамиевага, татар теле һәм әдәбияты укытучысы Кифая Хәбибуллинага, мәктәп директоры урынбасары Гөлшат Сибгатуллинага һәм дә конкурсның уңышлы үтүе өчен янып-көеп йөргән авыл җирлеге башлыгы Шамил Низамиевка рәхмәт. Аларга һәм дә мәктәп коллективына әлеге фестивальне яшәтү өчен көч-куәт, хәерле озын гомерләр, ныклы сәламәтлек теләп калабыз.