tatruen
Баш бит / Яңалыклар / Камал театры беренче мәртәбә Румыниядә фестивальдә катнаша
Камал театры беренче мәртәбә Румыниядә фестивальдә катнаша

Камал театры беренче мәртәбә Румыниядә фестивальдә катнаша

Г.Камал исемендәге Татар дәүләт Академия театры беренче мәртәбә Бухарест шәһәрендә (Румыния) Fest(in) on the Boulevard Халыкара фестивалендә катнаша. 15 октябрьдә камаллылар режиссер Фәрит Бикчәнтәевнең Йон Фоссе әсәре буенча куелган “Җәйнең бер көнендә” спектаклен уйный. Камал театры әлеге фестивальдә Россия театрларыннан бердән-бер катнашучы. Катнашучылар арасында Германия, Израиль, Болгария, Венгрия һәм Румыния театрлары бар.

Быел фестиваль 7нче мәртәбә үткәрелә. Fest(in) on the Boulevard 2013 елда Nottara румын театры тарафыннан оештырыла. Казан тамашачысына әлеге театр, быелгы Төрки халыкларның XIV “Нәүрүз” Халыкара театр фестиваленең хэдлайнеры булган – «Moliere» спектакле аша таныш.

Фестиваль төп ике өлештән һәм өстәмә бүлекләр, чаралардан тора. Беренче төп бүлек «Комедияле бульвар» дип атала –  ул румын һәм чит ил комедияләрен берләштерә. Фестивальнең икенче төп бүлеге көндәлек тормышның актуаль сорауларына багышлана.

Фестиваль көннәрендә, шулай ук, әдәби укулар, китаплар тәкъдим итү кичәләре, фотокүргәзмәләр һәм урам чаралары үткәрелә.

Спектакль хакында:

Һәр кешенең диярлек тормышында язмышны төптән үзгәрткән вакыйгалар була. Алар кабат-кабат үткәннәргә әйләнеп кайтырга, күңелдә таш булып яткан һәм истәлекләр чоңгылына тарткан бик күп сорауларга җавап эзләргә һәм шул хәлләрнең сәбәпләрен анализларга мәҗбүр итәләр. Норвегия авангардисты Йон Фоссе пьесасының сюжеты катлаулы түгел – героиня, иренең ни өчен аның тормышыннан югалуын, китүен аңларга тырышып, яшьлегендә булган вакыйгаларны искә төшерә. Әсәрнең формасы үзенә бертөрле укылышны таләп итә, чөнки асылда төп мәгънә эчтәлеккә генә корылмаган. Ул билгеле бер эзлеклелектә бирелгән күчеш-кичерешләрдә, берөзлексез үткәннәргә, әйтелгәннәргә кире кайтуда, героиняның тормыш мәгънәсен эзләп газаплануында һәм шул үзен битәрләгән әлеге кичерешләрдән яшәргә көч алуында ачыла.

Фикер калдырырга

Обязательные поля отмечены *

*