Акбаш авылының “Карлыгач” балалар бакчасында ата-аналар һәм балалар «Нәүрүз» бәйрәме үткәрделәр. Сабыйлар янына Нәүрүзбикә дә килде, төрле уеннар оештырдылар.
Сабыйлар язгы табигать турында шигырьләр сөйләде, әниләре, тәрбияче апалары бергә татар халкының милли уеннарын уйнады, ә соңыннан барысы бергә түгәрәк өстәл артына җыелышып карга боткасыннан авыз итте.
Язның көн белән төн тигезләшкән вакыты – 21-22 март – Нәүрүз бәйрәме буларак билгеләп үтелә. Нәүрүз – язны каршылап, язгы чәчү эшләре алдыннан үткәрелә торган халык бәйрәме ул.
“Бакчада башка халыкларның да милли бәйрәмнәрен менә шулай матур итеп оештырабыз, – ди балалар бакчасы тәрбиячесе Нурия Нигъмәтҗанова. – Менә шундый бәйрәмнәребез аша балаларда халыкларның йолаларына, гореф-гадәтләренә кызыксыну уяту һәм мәрхәмәтле, игътибарлы, әхлаклы балалар тәрбияләү бакчаның төп максаты”.
