Бүген хөрмәтле милләттәшебез, Бөек Ватан сугышы ветераны, Кенигсберг шәһәрен алуда катнашкан Хәким ага Биктеевнең туган көне. Хәким Биктеев –  Калининградта заманча мөселман җәмгыятенә нигез салучы да.

Калининград өлкәсе “Кардәшләр” татар милли-мәдәни җәмгыяте рәисе Әмир Хәйруллин Татарстан Республикасы Премьер-министры урынбасары, Бөтендөнья татар конгрессының Милли Шурасы рәисе Васил Шәйхразыевның котлауларын җиткерде.

Хәким Биктеев Мордовиянең Алтар авылында туган. 1943 елның 7 гыйнварында армиягә алына. Башта кече командирлар әзерләү буенча полкка эләгә, аннары снайпер училищесына эләгә, аны тәмамлагач, 1944 елда, 3 нче Белоруссия фронты составына укчы взводы командиры итеп билгеләнә. Белоруссияне, Литваны азат итүдә катнаша. 8 августта шакяя районында аягына авыр яралана. 1945 елның гыйнварында савыкканнан соң кабат 3 нче Белоруссия фронтына җибәрелә.

1945 елның 31 мартында маршал А.М. Василевский Кенигсберг шәһәренең хәрби комендатурасын булдыру турында боерык имзалый. Хәким Биктеев хәзерге Октябрь районы, А.Космодемьянский һәм Люблино Бистәсе карамагында булган 8 нче район хәрби комендатурасы офицерлары составында була.

Сугыштан соң Хәким Биктеев Балтыйк шәһәренең хәрби сәүдәсенә җибәрелә. Аннары Калининградта хәрби сатуны җитәкли. Пенсиягә чыкканчы «Кварц» заводында эшли. 1993 елда мөселманнарның дини оешмасын оештыручы һәм инициаторы була. 2011 елда «Калининград өлкәсе алдындагы хезмәте өчен» медале белән бүләкләнә.