Казанда Кабан арты мәчете манарасы төзекләндереләчәк. Ул шәһәрнең тарихи өлешендә Сәлимҗанов һәм Һади Такташ урамнары киселешендә урнашкан. Мәчет манарасын реставрацияләү проекты тарихи-мәдәни экспертиза узды, бу хакта ТР Мәдәни мирас объектларын саклау комитеты сайтында бастырылган документта хәбәр ителә.

Объектта экспертлар контрфорс фрагментларының югалуын, нигез конструкцияләренең дымлану эзләрен һәм гидроизоляциянең булмавын ачыклаганнар. Шулай ук стеналарда тикшерү вакытында кирпеч кладканың алгы өслегенең җимерелүе, измәләрнең җилдән ашалуы, кирпечнең механик зарарлануы һәм башка кимчелекләр табылган. Инженерлык коммуникацияләре, түбә, колонналар, түбәләр һәм баскычлар кебек үк, яраксыз хәлдә.

Белгечләр кирпеч кладканың алгы өслеген һәм фасадларын ремонтлаячак. Манара янында төп керү болдыры торгызылачак, тышкы болдыр булдырылачак һәм керү өлешендә пандус урнаштырылачак. Көнбатыш фасадтагы соңрак төзелгән янкорма һәм тышкы эвакуация баскычы сүтеләчәк. Биналарда эчке бизәлеш яңартылачак һәм үзгәртеп корулар үткәреләчәк, яңа уемнар барлыкка киләчәк, булганнары киңәйтеләчәк. Тарихи аналоглар буенча фасадларның тышкы ишекләре торгызылачак. Моннан тыш, башка эшләр дә башкарылачак.

Кабан арты мәчете уникаль, чөнки ул совет елларында мәхәллә кешеләре акчасына төзелгән. 1960 елдан изге урын федераль әһәмияттәге тарих һәм мәдәният һәйкәле дип таныла.

Бүгенге көндә объект ике катлы бинадан гыйбарәт, аның подвалы һәм җылытылмый торган чормасы, керү өлеше өстендә манарасы, михрабы һәм соңрак елларда төзелгән төньяк һәм көнбатыш янкормалары бар. Башта ул өч катлы манара белән уйланган. Әлеге манара Идел буе болгарларының тормышының өч этабын аңлаткан: исламга кадәрге, урта гасыр һәм яңа.

Чыганак: kzn.ru