Бүген, 24 мартта (13 сәг.), Кукмара район мәдәният йортында күренекле язучы Шаһинур Мостафинга багышланган«Яшьлегемә кире кайтыр идем… дип исемләнгән әдәби очрашу була. 70 яшьлек юбилее уңаеннан күренекле эзтабар әдипкә багышланган чаралар аның туган ягы Мамадышта узган иде инде. Шаһинур Мостафин өчен Кукмара төбәге  дә ят түгел. Ул «Хезмәт даны» дип аталган Кукмара  район газетасында 13 ел – 1970 – 1983 елларда хезмәт куйган, районның каләмле яшьләрен туплаган әдәби берләшмәне җитәкләгән.

Кукмарадагы очрашуда Казаннан һәм Кукмара белән чиктәш Киров өлкәсеннән дә кунаклар – драматург, Татарстан язучылар берлеге рәисе Данил Салихов,  тел галиме Фоат Галимуллин, шагыйрьләр Газинур Морат, Рүзәл Мөхәммәтшин, Рифә Рахман, Рифат Җамал, Мәрзия Мухина, прозаиклар Вахит Имамов, Рөстәм Галиуллин, Заһид Мәхмүди, Киров өлкәсе  татарлары оешмасы рәисе Рәүф Фәсхетдинов, «Ватаным Татарстан» газетасының баш мөхәррир урынбасары Габделбәр Ризванов, Киров өлкәсендә чыгучы  «Дуслык» газетасы журналисты Шәмсия Хәлимова һ.б. катнашачак.

Татарстан Язучылар берлегенең матбугат үзәге