18 ноябрь көнне Марий Эл Республикасының Бәрәңге районында җирле “Безнең тормыш” гәҗитенең 90 еллыгына багышланган тантаналы чара узды.
Басманы тәбрикләргә Бәрәңге районы башлыгы Әлфит Ибраев, Марий Эл республикасының татар мәдәнияте үзәге җитәкчесе Илгиз Гайсин, Бөтендөнья татар конгрессының Россия Федерациясе регионнарындагы татар массакүләм мәгълүмат чаралары белән эшләү бүлеге мөдире Булат Ибраһимов, “Шәһри Казан” гәҗите баш мөхәррире Радик Сабиров һ. б. мәртәбәле кунаклар җыелган иде.
Үз чыгышында Булат Ибраһимов Татарстаннан читтә нәшер ителүче татар басмалары алтындай кадерле булуын ассызыклап, Татарстан Премьер-министры урынбасары, Бөтендөнья татар конгрессының Милли Шура рәисе В. Г. Шәйхразыев исеменнән гәҗит редакциясе хезмәткәрләренә һәм аның баш мөхәррире Фәнил Мусинга Рәхмәт хатлары һәм истәлекле бүләкләр тапшырды.
