Татар теле, мәдәнияте һәм гореф-гадәтләренә багышланган «Чикләвек» интеллектуаль команда уены 28 ноябрьдә Мәскәүдә узачак, дип сөйләделәр Татарстанның Россиядәге Тулы вәкаләтле вәкиллегендә.
Конкурс бер үк вакытта 16:00 сәгатьтә Zoom онлайн-форматында һәм турыдан-туры Кызыл Октябрьдә Старт Хабта Берсенев яр буе (№6, стр. №3, 4нче кат) адресы буенча узачак.
Ярышларның приз фонды 132 мең сум тәшкил итә. Җиңүчеләр «татар бизәкләре төшерелгән » кием-салым, сувенирлар һәм башка товарларга акча сертификатлары алачак.
Бер командада катнашучылар саны кимендә алты кеше булырга тиеш. Катнашу бушлай, сылтама буенча 20 ноябрьгә кадәр теркәлергә кирәк.
