Кичә Галимҗан Ибраһимов исемендәге Тел, әдәбият һәм сәнгать институты хезмәткәрләре «Татар-информ» мәгълүмат агентлыгында узган матбугат очрашуында Көнбатыш Себер татарларына багышланган китаплар тәкъдим итте.
«Милли-мәдәни мирасыбыз» сериясендәге өч китап Омск, Томск һәм Новосибирск өлкәләре татарларына багышланган. Бу — Себер якларындагы милләттәшләребез турында икенче басма. Җыентыклар Көнбатыш Себердәге комплекслы экспедицияләр нәтиҗәсе буенча, шулай ук төбәкләрдәге элек чыккан яисә архивта сакланган материалларны анализлап әзерләнгән.
«Китапларда Себер татарларының тел, фольклор, сәнгать, археографик үзенчәлекләре чагылыш тапты. Басмаларда шулай ук андагы татарларның тарихы урын алган, кабер ташлары турында мәгълүматлар китерелгән», — диде Галимҗан Ибраһимов исемендәге Тел, әдәбият һәм сәнгать институтының фән эшләре буенча директор урынбасары, филология фәннәре кандидаты Олег Хисамов.
Китапларны Себер татарларына да тапшырганнар.
«Беренчедән, бу китаплар материалларыбызны тупларга мөмкинлек бирә. Икенчедән, Себер татарларының байлыкларын үзләренә кире кайтара. Без аларның әби-бабайларыннан мәгълүмат җыеп, архив материалларын табып, тулыландырып, үткәннәрен искә төшерсеннәр өчен, аларга кире кайтарып бирдек. Бу җыентыклар анда яшәүче һәр татарның өстәл китабы булырга тиеш», — диде Олег Хисамов.
Гадел Әхмәтҗанов
