1 апрельдә Питрәч районы Яңа Шигали авылына Мәүлә Колый иҗатын өйрәнергә илнең 12 төбәгеннән йөзләгән галим киләчәк. Биредә XVII гасырда иҗат иткән татар шагыйренә багышланган фәнни-гамәли конференция була.
“Иртәгә Питрәч районы Яңа Шигали авылында иртәнге тугыз сәгатьтә Мәүлә Колыйга багышланган фәнни-гамәли конференцияне башлыйбыз. Конференциягә Россиянең 12 төбәгеннән, Татарстанның 24 районыннан галимнәр һәм төбәкчеләр килүе көтелә. 150 докладка заявка бирелде. Төштән соң пленар утырыш планлаштырылган”, – диде “Татар-информ” агентлыгында узган матбугат конференциясендә төбәк тарихын өйрәнүчеләр белән эшләү комитеты җитәкчесе Альберт Борһанов.
Конференция кысаларында Мәүлә Колый туган Чита авылында шагыйрь истәлегенә куеласы стелага нигез салу, авылга экскурсия планлаштырылган. Алты метр биеклектәге стела җәй көне куелачак.
Конференциядә ясалган чыгышлар алты бүлектән торган фәнни җыентыкта тупланачак.
“Беренче бүлектә Питрәч районы тарихын бирәбез. Икенче бүлектә – район табигатенә күзәтү, өченчесендә – авыллар тарихына күзәтү ясыйбыз. Дүртенче бүлек Питрәчтән чыккан шәхесләр турында булачак, бишенчесе һәм иң күләмлесе – Мәүлә Колыйның иҗаты һәм тормышына, алтынчысы – музейларга, мәгарифкә багышланган. Кушымтага Чыты һәм Шәле авыллары халкының тәкъдимнәре, конференциянең резолюциясе керәчәк”, – диде Альберт Борһанов.
Альберт Борһанов сүзләренчә, төбәкчеләр тарафыннан тарихта тирән эз калдырган татарларны барлау, таныту эше алып барыла. “Татарларны танытып, милләтебезне үстерәбез”, – диде ул.
Рифат Каюмов
