Лаеш районы Сокуры авылы «Юлчы» мәчетендә 14 яшькәчә балалар арасында районкүләм Коръән уку бәйгесе узды.

Бәйгене Татарстан Диния нәзарәте Лаеш мөхтәсибәте оештырды. 60-тан артык кыз һәм малай тәҗвид кагыйдәләренә туры китереп, көйләп Коръән укуда ярышты. Жюри әгъзалары – хәфизләр – Коръән өйрәнү үзәге «Рашидә»дән килде.

Барысы 3 номинация булды: соңгы 10 сүрә, 30нчы җүз һәм 29-30 җүзләр. Һәр номинациядә өч призлы урын каралган. Җиңүчеләргә һәм һәр катнашкан балага бүләкләр тапшырылды.

Иң кечкенә катнашучылар – 4 яшьлек кыз һәм егет тә призлы урыннарга лаек булды. Бәйгегә балаларын алып килгән бер ханым оештыручыларга җылы каршы алу өчен, балаларны ашату-эчертү өчен рәхмәтләрен белдерде.

Мондый бәйгеләр – яшь буын өчен яхшы үрнәк, әти-әниләр өчен – изге эшкә күңел салуга этәргеч. Аллаһ сүзен күңелләрендә саклаган балалар, бәйгеләрне уздыручылар һәм спонсорлар белән Аллаһ риза булсын!