Республикакүләм «Татар кызы-2022» бәйгесендә Әтнә районыннан Гөлия Хәкимова махсус призга лаек булды. Гөлиягә 30 мең күләмендәге махсус бүләкне Татарстан Президенты каршындагы мәдәниятне үстерүгә ярдәм күрсәтү фондының башкарма директоры Нурия Хашимова тапшырды.
«Иң максатчан кыз» номинациясендә дә җиңүче булган Гөлия Хәкимова махсус бүләкне отуны көтмәгәне турында әйтте. «Нәрсә өчен биргәннәрен дә белмим. Минем нинди дә булса үзенчәлегемне күргәннәрдер», – ди Гөлия.
«Аның барлыгын белмәдек. Ул бөтен кешегә сюрприз иде. Көтмәдем дә әлбәттә! Аптырап басып торганда Әтнә кызы дип әйтүләренә дә реакциям: «Тукта, мин бит ул Әтнә кызы, юк, мин бит инде, әйе инде» – мизгел эчендә генә чиксез уйлар булды. Минем гадәти шөгыльләр, үз-үземне тоту, кызыксынулар барыбер кемгәдер үзгә була бит. Сәхнәдә чыгыш ясаганда гына аларның барысын аңлап бетереп булмый, тик аны күреп алган булсалар кирәк. Чынлап, олы рәхмәт белән кабул итәм ул призны, приздан бигрәк ул бит мине лаеклы итеп күрү, миңа ышану», – ди Гөлия.
Ул бәйгегә җиңү артыннан килмәвен дә әйтте. «Мин Әтнә данын лаеклы рәвештә күрсәтергә тырыштым», – ди Гөлия.
«Мин җиңү артыннан килмәдем. Һәрбер кыз үзенә «Татар кызы» һәм «Казан гүзәле» исемен тагып карагандыр. Мин дә карадым, карадым да, ул исемсез генә дә татарча уйларга, сөйләшергә миңа берәү дә комачау итми, аңа кадәр дә татар идем, моннан соң да шулай булачак, дидем. Җиңүче булмасам, күңелсезләнмәячәгемне, җиңсәм, ул исемне горур кабул итәчәгемне инде күптән белә идем», – диде ул.
Гөлия Хәкимова «Татар кызы» бәйгесенең үзенә көчле тәэсире булганын да сөйләде.
«Үземдә үзгәрешләр сизәм. Бу проект күп кенә әйбергә башкача карарга өйрәтте, җитешеп бетмәгән якларымны ачып аларны камилләштерергә булышты, гадәти тормышта мин борылып да карамаган ишекләрне ачты. Кичерешләр бераз үз ташкыны белән йөри, янәдән компьютер артында көне буе утырырга да уңайсыз булып китә хәтта. Ниндидер әкияти төш күрдем кебек, тик ул төшнең бик нык тәэсир иткәнен тоям», – дип сөйләде Гөлия Хәкимова.
