Агымдагы елның 19 апрелендә Татарстан Республикасы Рәисе Рөстәм Миңнеханов Мәскәүдә Поклонная тавында урнашкан Мемориаль мәчеттә уздырылган ифтарда катнашып, якташыбыз Хайдәр Исмәгыйль улы Мусинны юбилее уңаеннан “Татарстан Автономияле Совет Социалистик Респу­бликасы төзелүгә 100 ел” медале белән бүләкләде.

Хайдәр Мусин 1937 елда Чүмбәли авылында туган. 1964 елда Мәскәү Авиация-технология институтын тәмамлый. 1973 елдан А.Н.Туполев исемендәге ОКБның өлкән инженер-конструкторы, 1980 елдан алып баручы инженер-конструктор. Дөньяда беренче булып ягулык өчен сыек водород һәм сыек та­бигать газын кулланган ТУ 155 самолетын төзүдә алып бару­чы инженер-конструктор булып катнаша. 1997 елда “Россия Федерациясенең атказанган конструкторы” дигән мактаулы исемгә лаек була.

1988-1991 елларда Мәскәү җәмигъ мәчете каршындагы мәдрәсәдә дини белем ала. Илебез тарихында беренче булып Поляр йолдызны кулла­нып, мәчетләрнең кыйбласын дөрес кую методикасының ав­торы да ул. Бу методикага Рос­сия фәннәр академиясе зур бәя бирә.

Хайдәр Мусин Евразия Халыка­ра фәннәр академиясе әгъзасы. 2013 елда аның турында “Опе­редивший время” дигән доку­менталь фильм да төшерелгән иде. Ул халкыбызның телен, мәдәниятен һәм динен саклап үстерүгә зур өлеш керткән тын­гысыз җәмәгать эшлеклесе, биш китап, шул исәптән 2022 елда ту­ган авылы Чүмбәли турында 242 битлек “Точка на карте” дигән китапның да авторы.

Без шушы күренекле якташы­быз белән ихластан горурлана­быз, тагы да зуррак уңышларга ирешүен, исән-сау, пар канатлы булып озак кына яшәвен тели­без.

Хафиз АЛЯУТДИНОВ.

Түбән Новгород өлкәсе,

“Туган як” газетасы.