2018 елның февраленнән Татарстан Республикасында җирле үзидарә эшчәнлеге темасын яктыртучы «Время местных советов» телепроекты гамәлгә ашырыла. Бөтендөнья татар конгрессы Башкарма комитеты җитәкчесе Данис Шакиров татар халкының милли бәйрәме Сабантуй темасына багышланган телевизион программаның чираттагы чыгарылышында катнашты.
Билгеле булганча, Туган телләр һәм Халык бердәмлеге елында республикада тел һәм мәдәни күптөрлелекне саклау буенча күп санлы чаралар уза. Данис Шакиров республика һәм төбәкара дәрәҗәдә гамәлгә ашырыла торган иң мөһим проектлар турында сөйләде.
Якын арада Мөслим районында XI Бөтенроссия авыл Сабан туен уздыру көтелә. Бу бәйрәмнең үзенчәлекләре турында Мөслим районы башлыгы Рамил Муллин сөйләде.
