Социаль челтәрләр һәм мессенджерлар нәтиҗәсендә язылучылар бик тиз арта. Шуңа күрә «Татмедиа» бу платформаларда яңа медиа булдыруга инвестиция бирәчәк. Бу хакта «Татар-информ»га биргән интервьюсында медиахолдингның генераль директоры Шамил Садыйков хәбәр итте.
«Без ресурсларның 70 процентын яңа медиа булдыруга, шул исәптән Telegram һәм ТікТок проектларын үстерүгә юнәлдерергә ниятлибез. Хәзер яшь аудитория бу ресурсларны актив куллана, шуңа күрә безнең өчен төп бурыч — пабликлар үсешен тәэмин итү», – диде Шамил Садыйков.
Медиахолдингның тагын бер төп бурычы – YouTube проектларын үстерү. Ул «Салават күпере», «Сабантуй», «Ялкын» һәм «Идел» журналлары укучыларын берләштерә. Туган тел, тынычлык, космос турында, табигатьне һәм тормышның башка өлкәләрен өйрәнү буенча 30 видеоканал булдырылган.
«Татмедиа Junior» проекты безгә YouTube, Instagram һәм Тіктокларда эшли белүче белгечләрне әзерләргә ярдәм итәчәк. Бу яңа технологияләр белән эшли ала торган иҗат хезмәткәрләренең яңа буыны булачак. Без медиаконтентны кулланудагы үзгәрешләргә әзерләнергә тиеш һәм бу юнәлештә ТР Президенты, ТР Дәүләт Советы депутатлары ярдәме белән эш алып барабыз», — дип аңлатты Садыйков.
