Өлкәбездә «ГАРМОНиЯ» гармунчылар бәйгесе быел икенче тапкыр үткәрелә. Үткән ел анда күп кенә милләттәшләребез дә катнаштылар. Быел әлегә муниципаль турлар бара. Шәһәр көнендә Дзержинский урамында төмәнлеләр көч сынашты.

Татар мәдәният үзәге хезмәткәрләре Җәгъфәр Касыймов һәм Ислам Сафин «Инструменталь башкару» номинациясендә үзешчәннәр һәм профессионаллар арасында 1 дәрәҗә лауреат булдылар. Чын күңелдән котлыйбыз, алга таба да уңышлар елмайсын аларга. Зона туры октябрь аена билгеләнгән.

Бу ике гармунчыны өлкәбездә генә түгел, илдә яхшы беләләр. Алар һәр бәйрәмнең үзәгендә: биетәләр дә, җырлыйлар, үзләре дә бииләр. Бер дигән данлыклы ансамбльләр җитәкчеләре дә!

«ГАРМОНиЯ» гармунчылар бәйгесе рухи мирасның бер өлеше буларак үзенчәлекле халык иҗатын саклау һәм үстерү, киң аудитория арасында традицион халык мәдәниятен пропагандалау һәм популярлаштыру максатларында үткәрелә. Аның бурычлары: гармунда уйнауны популярлаштыру, сәләтле гармунчыларны табу, яшьләр арасында кызыксыну уяту.

Гөлнур ВӘЛИЕВА.