«Уйлап карасаң, Тукай заманында башка шагыйрьләр, язучылар да булган. Татар халкының язмышын, этнографиясен белергә теләсәң, Тукай иҗатына гына да мөрәҗәгать итәргә дә буладыр. Аның иҗатында татар халкының сулышы, рухы, үткәне, киләчәге ярылып ята», – диде ул «Татар-информ» хәбәрчесенә.

Рәмис Аймәт фикеренчә, Габдулла Тукай кебек, 27 яшендә халык шагыйре дәрәҗәсенә ирешү һәркемгә бирелмәгән.

«Тукай үз заманының халкының теленә килгән фикерен, проблемасын әйтеп биргән. Шуңа күрә дә ул халыкка якын. Милләт язмышының киләчәге өчен борчылып яшәгән», – диде ул.

«Тукайның шигырьләрен, публицистик әсәрләрен кулга аласың да уйланасың: Тукай һаман искермәгән, һаман безнең белән, дип әйтәсең. Милләт, мәдәният, сәнгатькә карата әйтелгән фикерләре бүген дә актуаль», – диде Татарстан Язучылар берлеге рәисе, ТР Дәүләт советы депутаты Ркаил Зәйдулла.

Аның әйтүенчә, Тукайның сүзләре халык күңелендә һаман өмет уята. «Без әле тиз генә бирешә торган, югала торган халык түгел. Тукайлы халык югалмас», – диде Ркаил Зәйдулла.

Филология фәннәре докторы, әдәбият галиме Зөфәр Рәмиев XX гасыр башында татар әдәбияты яңарыш кичерүен искәртте. «Тукай шушы яңарышны тулы итеп гәүдәләндерүче. Тукай – шагыйрь. Шул ук вакытта ул милләт өчен дә кайгыртучы, аның шигыренең нигезендә милләтпәрвәрлек ята. Ул шигъриятне моңа кадәр күтәрмәгән биеклеккә күтәрде», – ди ул.

Кичәдә Тукай шигырьләре һәм Тукай юлларына җырлар яңгырады. Россиянең атказанган артисты Дания Нуруллина, Татарстанның халык артистлары Луара Шакирҗанова, Фоат Әбүбәкеров һәм Искәндәр Биктаһиров, Татарстанның атказанган артисты Раил Шәмсуаров, халыкара конкурслар лауреаты Айгөл Зәйнуллина, Казан музыка көллияте студентлары Миләүшә Закирова, Илсаф Гыйльметдинов һәм Рөстәм Егоров чыгыш ясады.

Кичә башланганчы бер төркем татар җәмәгатьчелеге Тукай музее мөдире Гүзәл Төхвәтова белән Яңа Татар бистәсе зиратында шагыйрь каберенә чәчәкләр салды. Истәлекле чаралар Тукай әдәби музеенда алга таба да дәвам итәчәк.