Җир шары буйлап сибелгән татарларны берләштерүче һәм милләтебез данын дөньяга танытучы Татарстан Республикасын, аның зирәк карашлы җитәкчеләрен, кунакчыл, тапкыр һәм батыр халкын 30 августтагы милли Республика көне белән ихластан котлыйбыз һәм Нижгар төбәгенә горурланырлык шәхесләр үстереп биргәннәре өчен татарстанлыларга чиксез рәхмәтләребезне юллыйбыз!
Безнең борынгы мөгаллим Хөсәин Фәезханов, Совет язучысы Кави Нәҗми, халык артистлары Рәшит Ваһапов, Хайдәр Бигичев һәм Рамил Курамшин кебек якташларыбыз бары тик Татарстанда гына олуг дәрәҗәгә иреште, мактаулы исемнәр казанды.
Сергач шәһәрендә 33 ел дәвамында чыгып килгән Нижгар татарларының атналык газетасын булдыруда да, хәзер аңа махсус кушымта итеп айга бер мәртәбә “Без – бергә” газетасын юллап торуда да, Дзержинск һәм Түбән Новгородта оештырылып килгән сабантуйларны уздыруда да Татарстанның ярдәме бик зур һәм урынлы. Ә инде татарлыкны саклау буенча төрле һөнәр ияләренең даими рәвештә мәркәзебез Казанга җыелып тәҗрибә уртаклашулары аеруча зур игътибарга һәм тирән ихтирамга лаек.
Приоритетлы юнәлешләрне милләтебез файдасына алга сөреп, халыкара дуслыкны ныгытуга өлеш кертеп, башка регионнарга үрнәк өлгесе булып Татарстаныбыз мәңге яшәсен!
Олег Әндәрҗанов, Түбән Новгород өлкәсе татарлары газетасы баш мөхәррире.
Сергач.
