Түбән Новгород өлкәсе мөселманнары Диния нәзарәте үзенең чираттагы күчмә пленумын Пашат мәчетендә үткәрде. Көн тәртибенә өч төп сорау чыгарылган иде – Диния нәзарәте рәисенең 2023 елда баш­карылган эшләргә отчеты, якынлашып килүче Рамазан аенда йолаларны үтәү һәм агымдагы елга планнар белән таныштыру. Пленумга җыелган 50дән артык имам һәм җирле дини оешма­лар җитәкчеләрен һәм чакырылган хөрмәтле кунакларны авыл хакимияте җитәкчесе Наил Ата­уллин сәламләде һәм нәтиҗәле фикер алышу теләде, ә мәчет имамы Марат хәзрәт Сәлахетдинов Коръән укып утырышны башлап җибәрде.

Гаяз хәзрәт Закиров үз чы­гышында 2023 ел дәвамында танылган мәгърифәтче, га­лим, фән эшлеклесе Хөсәин Фәезхановның 200 еллыгына багышланган семинарлар, очра­шулар, тикшерү-өйрәнү эшләре, конкурслар күпләп оештырыл­ганы турында сөйләде. Төбәк мөселманнарының тормышына кагылган иң мөһим һәм әһәмиятле чара, әлбәттә, Түбән Новгород­та узды. Күп инстанцияләр буен­ча уңышсыз йөргәннән соң, шәех Равил Гайнетдиннең шәхсән катнашуында, өлкә губернаторы Глеб Никитинның ярдәме белән тарихи дөреслекне торгызып, элекке Ярминкә мәчетенә нигез салынды. Шул истәлекле дата­га туры китереп үткәрелгән өлкә съездында Диния нәзарәтенең рәисе сайланды. Гаяз хәзрәткә ышанычларын белдереп, мулла­лар бу вазифаларны кабат аңа йөкләде. Бу көнне дә имамнар җәмгыяте аның эшчәнлеген юга­ры бәяләде һәм бертавыштан исәп-хисабын кабул итте.

Пленум утырышында күренекле җәмәгать эшлеклесе дә кунак булды – Нижгар татарлары кон­грессы рәисе Гаяр ага Хәсәнов өлкә Диния нәзарәте эшеннән канәгатьлеген белдерде һәм юл уңаеннан Марат хәзрәт Сала­хетдиновка Рәхмәт хаты белән бүләк тапшырды.

Өлкә Алемнар шурасы рәисе Мөнир хәзрәт Баюсов якынла­шып килүче Рамазан аена тук­талды. Изге аебыз 10 мартта кояш баеганнан соң башланачак, 5-6 апрельгә Кадер киче туры килә, ә Ураза гаете 10 апрельдә билгеләнеп үтеләчәк. Рамазанга кагыла торган тагын бер мөһим мәсьәлә – тәравих намазында укыла торган рәкагатьлар саны. Үткән елдагыча аны 20дә кал­дырдылар.

Өлкә руханилары лидеры урын­басары Фәнис хәзрәт Сәлахет­динов Диния нәзарәтенең 2024 елга эш планы белән ипләп кенә таныштырып чыкты.

Быел Дзержинск Җәмигъ мәчете төзелүгә – 10, ә “Маһинур” мәдрәсәсенә 30 ел тула һәм кайбер чаралар шул даталарга багышланачак. Шулай ук ДУМ РФ тарафыннан игълан ителгән “Мөселман гаиләсе” елы да игъ­тибар үзәгендә булырга тиеш.

Рухи-агарту, истәлек һәм баш­ка чаралар да үткәрү планлаш­тырылган. Мәсәлән, апрельдә Түбән Новгородның Җәмигъ мәчетендә Коръән укучылар конкурсы һәм төбәгебезнең күренекле шагыйрьләре Әхмәт Баюсов (Мөтеравыл) һәм Вафа Камалетдиновның (Сафаҗай) иҗатларына багышланган “Рухи мирас” фәнни-практик семи­нар узачак. Икенчесенең үткәрү урыны һәм төгәл көне соңыннан билгеле булыр.

13 июльдә Семочки белән Па­шат арасындагы мемориаль ком­плекста Хәтер көне оештырып, бу авылларның гаепсез үтерелгән имамнарын искә алырлар.

Гадәттәгечә, җәй айларын­да мәчетләр каршында бала-яшүсмерләр өчен мәдрәсәләр эшләр.

Сентябрь-октябрьдә Россия мөселманнары Диния нәзарәтенең съезды узачак һәм аның кысаларында бу органның рәисе сайланырга тиеш.

Фәнис хәзрәт авыл мәхәлләләреннән ел әйләнәсендә үткәреләчәк чаралар планын да көтеп калуын белдерде. Иң мөһиме – бу турыда алдан белдерергә кирәк, шул очракта гына аңа өлкәнең кайсы булса рухи лидерының барып чыгуы ихтимал, диде.

Шулай ук, һәръелдагыча, имамнарның белем дәрәҗәсен арт­тыру максаты белән өч атналык курслар оештырыла, аларны йом­гаклап хәзрәтләр имтихан тотачак.

СВОда катнашучылар файда­сына ярдәм күрсәтү темасы да күтәрелде. Бу мәсьәләдә руха­нилар ярдәмне үзәкләштерелгән чыганаклар аша юлларга киңәш итте. Мәсәлән, шул максатлар белән “Единство и сплочение” фонды гамәлгә куелган. Аның эшчәнлеге турында Диния нәзарәтенең эшләр идарәсе җитәкчесе Рамил Надюков сөйләде.

Көн тәртибендә булган со­рауларны карагач һәм раслагач, бүләкләү тантанасы булып үтте. Мөнир хәзрәт кайбер имамнар­га Мөфти Равил Гайнетдиннең Рәхмәт хатларын тапшырды, ә Гаяз хәзрәт урыннардагы мәхәллә җитәкчеләренә өлкә Диния нәзарәте 5 елга раслаган таныклыклар өләште.

Өйлә намазын укыгач пленум делегатлары мәчетнең беренче катында корылган мәҗлестә ку­нак булды. Табынны авылның бер төркем уңган-булган ха­нымнары әзерләгән, ә Пашатта яшәүче Ринат һәм Гөлнара Аб­дуллиннар тарафыннан нәзер корбаны чалынган.

Табын артында утырганда Гаяз хәзрәт “Туган як” газетасының өлкә мөселманнарының рухи-әхлакый тәрбиясенә керткән өлешен югары бәяләде һәм бөтен имамнарга кимендә бер генә данә булса да подписка рәсмиләштерергә киңәш итте.

Илнар САДЕКОВ.

“Туган як” газетасы