Татарстан Премьер-министры урынбасары, Милли Шура рәисе Васил Шәйхразыев эшлекле сәфәр белән Россиянең кайсы төбәгенә генә барса да, мәчеттә булып дога кыла, аның имамы белән аралашып, гыйбадәт йортының эшчәнлеге белән кызыксына. Бүген ул Төньяк башкаладагы Җәмигъ мәчетен дә читләп узмады.
Санкт-Петербург шәһәрендәге гыйбадәт йортына нигез 1910 нчы елда салына. Җәмигъ мәчетен төзетүдә башлап йөрүче, төп оештыручыларның берсе – танылган мәгърифәтче Габдулла Баязитов. Ул 1881 елда Петербург мөселман җәмгыяте исеменнән, Россия хакимиятенә мөрәҗәгать итә. 1906 елда рәсми рәвештә мәчет төзү өчен ил буенча акча җыю хәрәкәтен башлап җибәрергә рөхсәт алына. 1910 елның февралендә күп санлы дәрәҗәле кунаклар катнашында нигез ташын салу тантанасын оештыралар.
