Узган атнада Казанда республика Президенты катнашында Идел буенда Ислам динен кабул итүгә 1100 ел тулу бәйрәмен оештыру һәм уздыру комитетының чираттагы утырышы булып узды. Анда әлеге тарихи вакыйгага багышланган чараларны Татарстанда гына түгел, ә кан-кардәшләребез яши торган барлык төбәкләрдә дә зурлап үткәрү кирәклеге ассызыклап әйтелде. Әлеге изге эшне беренчеләрдән булып Мордовия Республикасында яшәүче милләттәшләребез башлап җибәрде. Биредә бу зур юбилей уңаеннан Казаннан һәм тирә-күрше төбәкләрдән килгән галимнәр һәм Ислам дине белгечләре катнашында фәнни-гамәли конференция үтте. Анда яңгыраган кайбер фикерләрне Рамис Сафин тыңлап кайтты.