enrutat
Баш бит / ВИДЕО: Апас районының Урта Балтай авылы халкы ничек яши?

ВИДЕО: Апас районының Урта Балтай авылы халкы ничек яши?

“Тәгәрмәч”ебез, тәгәри торгач, тагын бер иң шәп татар авылына юлыкты. Бу юлы Апас якларына, төгәлрәк әйтсәк, Урта Балтай авылына юл тоттык. Монда безне гармун моңнары белән каршы алдылар. Гармунчы Хәсән абыйны авыл хатыннары тән сакчылары сыман саклап кына йөртә.

Урта Балтайның янып торган баланнарыннан авыз иттек, иң атаклы чишмәләренең суын да дегустацияләдек. Кытай, Котылдык, Аптыраганнар атамалы урамнар барлыгын да белдек.

Монда яшәүче Зәйтүнә апа ел саен, сөлге чигеп, аны ат чабышында катнашучыга бүләк итеп бирә. Ләкин беренче булып килгән җайдакка түгел, ә соңгысына. Никме? Чыгарылышны карагач белә алырсыз.

Балтайның «Кулибиннары» белән дә танышу насыйп булды. Шәйхелислам белән Расих абыйлар тимердән күп төрле файдалы әйберләр ясый. Расих абыйның ишегалдын күрсәгез… Матурлыктан күзләр дә камашып куя!

Җырлый торган күперне күреп, аңа кушылып моңланасы килеп китте хәтта. Апас ипиенннән авыз итеп, хатирәләргә бирелеп алдык.

Ачык, киң күңелле Урта Балтай халкына зур рәхмәт! Сез дә килеп күрегез мондагы матурлыкны!

“Тәгәрмәч” – социаль челтәрләрдә иң шәп татар авылларын, аларның бай тарихын, анда яшәүче уңган-булган кешеләрен, гореф-гадәтләрен күрсәтүче проект.

Фикер калдырырга

Обязательные поля отмечены *

*