Казанның Мәскәү мәдәни үзәгендә Галимҗан Ибраһимов исемендәге тел, әдәбият, һәм сәнгать институты галимнәре экспедиция материалларыннан күргәзмә ачылды. Анда Идел буе, Урал, Себер татарлары тормышы турында төрле елларда төшерелгән фото сүрәтләр куелган.
Болар – авыл, йорт күренешләрен, эш коралларын, милли киемнәрне, үзенчәлекләрне, йолаларны, гореф-гадәтләрне чагылдырган бай сүрәтләр. Курчак сүрәтләренә аерым урын бирелгән. Төрле төбәкләрнең үзләренә генә хас милли киемнәре дә кызыксыну уята. Күргәзмә милләттәшләребезнең 19 нчы, 20 гасырлардагы кул эшләре – туку, чигү, эрләү, бәйләү, энҗе-мәрҗән әйберләре үрнәкләре төшерелгән фото сүрәтләргә дә бай.
