Г.Тукайның 135 еллыгы уңаеннан Татарстан Милли музеенда ел дәвамында юбилей чаралары оештырылачак. 29 апрельдә Казан метросының “Тукай мәйданы” станциясендә 11:00 сәгатьтә шагыйрь иҗатына нисбәтле күргәзмә ачыла.
Мәгълүм булганча, татарның танылган рәссамы Бакый Урманче “Шүрәле” әкиятенә иллюстрацияләр иҗат иткән. Әлеге хезмәтләрнең күбесе күргәзмәгә беренче тапкыр куела, чөнки совет заманында аларның кайберләре цензура аша узмаган була. Милли музей фондларында сакланучы әлеге рәсемнәр Казан халкы һәм шәһәр кунаклары игътибарына тәкъдим ителәчәк.
