Бүген Уфа шәһәрендәге Бөтендөнья татар конгрессы вәкиллегендә күренекле композитор, музыка белгече, педагог, җәмәгать эшлеклесе Солтан Габәшигә багышланган лекция узды. Чараны биредә эшләп килүче Мәрьям Солтанова-Акчурина исемендәге клуб оештырган.
Лекцияне Россиянең атказанган, Татарстанның һәм Башкортстанның халык артисты, профессор Идрис Газиев укыды.Лекция барышында халкыбызның беренче профессиональ композиторы, музыка белгече, хормейстеры, татар операсына нигез салучы, милләтебезнең күренекле шәхесе Солтан Хәсәнгата улы Габәшинең тормыш юлы һәм иҗаты тирәнтен ачылды.
Очрашуда Бөтендөнья татар конгрессы Башкарма комитеты җитәкчесенең Россия Федерациясе төбәкләрендәге татар иҗтимагый берләшмәләре белән эшләү буенча урынбасары Марс Рифкать улы Тукаев катнашты.
