Төмәндә Яңавыл мөселман зиратында «Хәтер бакчасы» акциясе узды. Парфеново микрорайонында яшәүчеләр һәм теләгән башка кешеләр 60 нарат агачы утыртты. Акциянең инициаторы – «Яңавыл бохара-татар утары» тарихи-мәдәни тыюлыгы проекты авторы Альмира Сажина.
Борынгы авылны яңарту белән шөгыльләнүче Альмира ханым сүзләренчә, быел Яңавылга 385 ел тула. «Яңавылга Бохарадан килгән байлар нигез салган», – дип сөйләде Альмира Сажина. Бу хакта Россия мөфтиләр шурасы хәбәр итә.
«Хәтер бакчасы» акциясе беренче мәртәбә генә узмый. Узган елда район халкы Җәмигъ мәчетенең тирә-ягына агачлар утырткан һәм анда Яңавыл тарихына багышланган стенд ачкан. Элегрәк мондый стендлар 9 нчы мәктәп территориясендә дә ачылган булган.
Киләсе елда «Хәтер бакчасы» акциясе Тура елгасы янында узачак. Бу урынны таллардан чистартачаклар һәм Хөсәеновларның, Матиаровларның, Гомәровларның, Усмановларның нәсел дәвамчылары агачлар утыртачак.
