Атна башы белән иртән редакциягә Красный Остров авылы башлыгы Максут Алимов шалтыратты һәм авылга ялга күренекле якташы, Континенталь Хоккей Лигасының (КХЛ) ЦСКА хоккей командасы тренеры Равил Якубовның (фотода) кайтуын белдерде. Газетабыз битләрендә спорт өлкәсендә казанышларга ирешкән милләттәшләребез турында еш язабыз. Шуңа тиз арада җыенып, ерак сәфәргә кузгалдык.
Равилның әти-әнисе – Әмир абый белән Рауза апа Түбән Новгород өлкәсенең Краснай авылында туып-үскән, аннары башкалага китеп төпләнгән. Әтисе зур бер заводның конструкторлык бюросын җитәкләгән, әнисе дә шунда эшләгән.
Равил 1970 елның 26 июлендә туган. Балачактан ук хоккей белән профессиональ дәрәҗәдә “Динамо” командасының спорт мәктәбендә шөгыльләнә башлаган һәм аның белән ике тапкыр Советлар Союзы һәм Россия чемпионы исемен яулаган, Халыкара класслы спорт мастеры дәрәҗәсенә ирешкән, милли җыелма команда составында 1995 елда дөнья чемпионатында катнашкан. Ә 2005 елда хоккеист карьерасын тәмамлагач, тренерлык һөнәренә күчә һәм 2018 елдан ЦСКАда баш тренер ассистенты, һөҗүмчеләр остазы булып эшли.
Белгәнегезчә, ЦСКА быел икенче тапкыр Гагарин кубогын яулады, шуңа милләттәшебез белән очрашырга барганда КХЛның төп трофеен да күрергә хыялландык.
«Һәр яулаучының кубокны туган ягына алып кайтырга хокукы бар, әмма ике көнгә генә. Без инде бер атнага кайттык. Үзегез беләсездер, авыл җирендә җәй көне эш күп. Төп йортны, азбарны тәртипкә китердек. Зиратка барып, кардәшләрне искә алдык. Иркен нигездә бертуган энеләр һәм сеңелләр белән җыелышып ял итәбез” – дип сөйләде күренекле якташыбыз.
Икенче көнне Равил кире Мәскәүгә юл тотты, чемпионнарны яңа сезонга әзерләргә вакыт инде. Әлеге язмабыздан соң, “армиялеләрнең” тамашачылар саны милләттәшләребез исәбенә тагы да арта төшәр, дип уйлыйбыз.
Илнар САДЕКОВ.
“Туган як” газетасы
