14 май көнне Йошкар-Ола шәһәрендә Россиядә ислам динен кабул итүнең 1100 еллыгына, илебездә халыкларның мәдәни мирасы елына һәм Марий Эл Республикасының Татар мәдәни үзәгенә 25 ел тулуга багышланган «Рамазан- 2022» I регионара татар үзешчән иҗаты акциясе узды.
Оештыручылары Республиканың мәдәният, матбугат һәм милләт эшләре министрлыгы һәм Татар мәдәнияте үзәге булган чараның төп максаты – милли-мәдәни мирас традицияләрен өйрәнү, пропагандалау, үстерү, шәһәрдә һәм авылларда яшәүче татар халкының үзешчән иҗатына кызыксыну уяту, бәйрәмдә катнашучыларның башкару осталыгын арттыру, төрле яшь категорияләрендә яңа талантларны ачыклау һәм яшь башкаручыларга ярдәм итү.
Акциядә Татарстан, Чувашстан, Марий Эл Республикалары, Түбән Новгород, Пермь һәм Киров өлкәләреннән үзешчән артистлар катнашты. Алар «Вокал», «Хореография», «Халык уен коралларында уйнау», «Нәфис сүз» (бәетләр һәм мөнәҗәтләр) номинацияләрендә үзләренең талантларын күрсәтте. Барлык катнашучылар да югары дәрәҗәдә әзерләнгән иде. Кырыс, әмма гадел жюри һәр катнашучыны лаеклы бәяләде.
Түбән Новгород өлкәсе данын бу бәйгедә Спас районы Татар Моклокасы һәм Бозлау авыллары үзешчән иҗат коллективлары уңышлы яклады. Әйтергә кирәк, нәтиҗәләре дә куанырлык. Мәсәлән, Татар Моклокасының “Татар хатыннары” коллективы “Вокал” номинациясендә III дәрәҗә, Рафаэль Махмутов «Халык уен коралларында уйнау» номинациясендә III дәрәҗә, Хамдия Азизова «Нәфис сүз»дә мөнәҗәт башкарып III дәрәҗә, Наилә Рәхимова «Вокал»да II дәрәҗә лауреат Дипломнары белән бүләкләнде.
Бозлауның “Алтын хәзинә” төркеме солистлары Җәмилә Салихова һәм Рәхилә Юсипова “Вокал” буенча I дәрәҗә, ә Светлана Юнисова II дәрәҗә лауреат Дипломына лаек булды. «Нәфис сүз» номинациясендә (мөнәҗәт) Алимә Ганеева I дәрәҗә, ә Адилә Нафеева (шигырь) II дәрәҗә лауреат Дипломы белән бүләкләнде.
Татар Моклокасы һәм Бозлау делегатлары «Рамазан» чарасын оештыручыларга, сәфәргә чыгарга ярдәм күрсәткән район мәдәният бүлегенә олы рәхмәтләрен белдерә.
Без, үз чиратыбызда, якташларыбызны ихластан котлыйбыз һәм яңадан-яңа уңышлар теләп калабыз.
Румия ХАМЗИНА.
“Туган як” газетасы
